Әйелдер арасындағы Ұлттық лиганың екінші турындағы басты тартыстар
Фото: Игорь Травкин
15–16 қазанда Петропавл, Түркістан, Өскемен және Алматы қалаларында екінші турдың матчтары өтеді. Бұл кездесулерде «Quanysh» «Ertis» командасының дайындығын сынаса, «Жетісу» сырт алаңда «Тұранмен» кездеседі. «Қарағанды» ВК «Berel» командасына лайықты қарсылық көрсетуге тырысады, ал «Буревестник» пен «Ақтөбе» арасындағы ойындар турдың ең тартысты кездесулеріне айналуы мүмкін.
«Quanysh» – «Ertis»
Өтетін орны: «Қуаныш» спорт кешені
Күні мен уақыты: 15 қазан – 18:00, 16 қазан – 18:00
Солтүстік Қазақстан облысының командасы дәстүрлі түрде Қазақстан чемпионатының басты фавориттерінің бірі саналады. Ал осы маусымда Ұлттық лигаға қайта оралған павлодарлық командаға қонақта екі бірдей күрделі кездесу өткізуге тура келеді.
Алдағы ойындардың ерекшелігі – екі команданы да шетелдік мамандар жаттықтырады. Алаң иелерінің бас бапкері – түркиялық маман Саим Паккан, ал қонақтар командасын Украинадан келген Евгений Николаев жаттықтырады.
Бірінші турда «Quanysh» «Қарағандыны» екі рет жеңсе, «Ertis» сырт алаңда «Жетісуға» екі мәрте есе жіберді.
«Тұран» – «Жетісу»
Өтетін орны: Olympic Center
Күні мен уақыты: 15 қазан – 18:00, 16 қазан – 18:00
Түркістанда Қазақстан Кубогының қазіргі иегері мен ел чемпионы арасындағы екі матчтан тұратын текетірес өтеді.
Асқар Шалкибеков пен Марко Гршич жаттықтыратын командалар әзірге екі жеңістен тұратын сериясын жалғастырып, қарсыластарына бірде-бір партия берген жоқ. Бірінші турда «Тұран» өз алаңында «Ақтөбені» екі рет сенімді түрде жеңсе, «Жетісу» Талдықорғанда ВК «Ertis» командасынан басым түсті.
«Berel» – «Қарағанды»
Өтетін орны: «Жекпе-жек» спорт кешені
Күні мен уақыты: 15 қазан – 18:00, 16 қазан – 18:00
Өткен маусымаралық кезеңде Шығыс Қазақстан облысының клубы құрамын едәуір жасартып, бас бапкер қызметіне түркиялық маман Халук Коркмазды шақырды. Қарағандылық команданы бұрынғысынша Нұрлан Садықов жаттықтырады.
Бірінші тур екі команда үшін әртүрлі нәтиже көрсетті. «Berel» «Буревестникті» екі рет жеңсе, «Қарағанды» ВК «Quanysh» командасына қарсы кездесулерде ұпай ала алмады.
«Буревестник» – «Ақтөбе»
Өтетін орны: «Достық» спорт кешені
Күні мен уақыты: 15 қазан – 18:00, 16 қазан – 17:00
Турдың ең қызықты кездесулері Алматыда өтеді деп күтілуде. Алматы қаласында үш жылдан астам уақыт бойы әйелдер волейболының жанкүйерлері жергілікті командалардың ойындарын тамашалай алмады. Бірінші турда алаң иелері де, қонақтар да ұпай жинай алмады: «Буревестник» Өскеменде, ал «Ақтөбе» Түркістанда қарсыластарына есе жіберді. Енді екі команда да жағдайды түзетуге бар күшін салмақ.
Маусымаралық кезеңде екі клуб та бас бапкерлерін ауыстырып, құрамдарын едәуір жаңартты. Сондықтан 15 және 16 қазанда өтетін алматылық және ақтөбелік командалардың кездесулері волейбол жанкүйерлеріне тартысты ойын сыйлайды деп күтілуде.
