Юлия Акулова – VNL финалында
Волейболдан ерлер арасындағы VNL Ұлттар лигасының финалдық матчына Польша мен АҚШ ұлттық құрамалары арасындағы шешуші кездесуге қазақстандық халықаралық дәрежедегі төреші Юлия Акулова екінші төреші болып тағайындалды.
Бұл тағайындау – Юлия Акулованың кәсіби шеберлігі мен халықаралық деңгейдегі тәжірибесіне берілген жоғары баға, сондай-ақ Қазақстан төрешілер мектебінің әлемдік волейбол қауымдастығындағы беделінің айқын көрінісі.
Әлемнің ең үздік құрамалары бақ сынайтын VNL финалында төрелік ету – үлкен жауапкершілік пен сенімнің белгісі. Мұндай мәртебелі кездесуге төреші ретінде қатысу халықаралық деңгейдегі кәсібиліктің дәлелі саналады.
Қазақстан волейбол федерациясы Юлия Акулованы осы маңызды жетістігімен құттықтап, алдағы халықаралық жарыстарда толағай табыс пен сәттілік тілейді!
