Қазақстан құрамасы әлем чемпионатының ширек финалында

Қазақстан құрамасы волейболды отырып ойнаудан әлем чемпионатының ширек финалына шықты

Қазақстан Республикасының волейболды отырып ойнаудан ұлттық құрамасы Қытай Халық Республикасының Ханчжоу қаласында өтіп жатқан әлем чемпионатында жоғары нәтиже көрсетіп, турнирдің ширек финалына жолдама алды.

10–17 шілде аралығында ұйымдастырылып жатқан әлем біріншілігінің 1/8 финалында қазақстандық спортшылар Польша ұлттық құрамасымен кездесіп, қарсыласынан 3:0 (25:18, 25:18, 25:20) есебімен айқын басым түсті. Осылайша Қазақстан құрамасы әлем чемпионатының үздік сегіз командасының қатарына енді.

Қазақстан мен Польша құрамалары арасындағы кездесуді Халықаралық Паралимпиада комитетінің президенті Эндрю Парсонс арнайы тамашалап, әлемдік деңгейдегі жарыстың жоғары ұйымдастырылуына және спортшылардың шеберлігіне куә болды.

Қазақстан волейбол федерациясы ұлттық құраманы маңызды жеңісімен және әлем чемпионатының ширек финалына шығуымен құттықтай отырып, алдағы ойындарда табыс, сәттілік және жарқын жеңістер тілейді.