Қазақстанның U-18 құрамасына жаңа бапкер тағайындалды

Владимир Аниконов – Қазақстанның 18 жасқа дейінгі қыздар құрамасының жаңа бас бапкері.

Волейбол саласындағы білікті маман Владимир Аниконов жасөспірімдер құрамасын жаттықтыру тізгінін өз қолына алды. Бұған дейін ол өскемендік «Алтай» мен «BEREL» клубтарында жемісті еңбек етіп, командалардың кәсіби деңгейінің өсуіне зор үлес қосқан. Сондай-ақ, талдықорғандық «Жетісу» командасының бапкерлер құрамында қызмет етіп, елішілік және халықаралық жарыстардағы табыстарға атсалысқан тәжірибелі маман.

Алдағы уақытта Аниконовтың басты мақсаты – құраманы Таиландта өтетін Азия чемпионатына сапалы дайындау. Қазақстандық волейболшылар құрлықтың ең мықты деген командаларымен бәсекеге түсіп, биік нәтижелер көрсетуді көздеп отыр.

Қазақстан волейбол федерациясы жаңа бас бапкерге сәттілік тілей отырып, ұлттық құраманың халықаралық додаларда абыроймен өнер көрсететініне сенім артады.